மர்மதேசம் படத்தின் இயக்குனர் நாகா இயக்கத்தில் உருவாகியிருக்கும் இணையத் தொடர் தான் “ஐந்தாம் வேதம்”. அக்டோபர் 25 முதல் இத்தொடர் Zee5 ல் ஸ்டிரீமாகிறது.
சாய் தன்ஷிகா, சந்தோஷ் பிரதாப், விவேக் ராஜகோபால், ஒய் ஜீ மகேந்திரன், கிரிஷா குருப், ராம்ஜி, தேவதர்ஷினி, மேத்யூ வர்கீஸ், பொன்வண்ணன் என பல நட்சத்திரங்கள் நடித்திருக்கின்றனர்.
ஸ்ரீநிவாசன் தேவராஜன் ஒளிப்பதிவு செய்திருக்கும் இத்தொடருக்கு ரேவா இசையமைத்திருக்கிறார்.
அபிராமி மீடியா ஒர்க்ஸ் இத்தொடரை தயாரித்திருக்கிறது.
கதை
கதை
காசியில் பூஜைக்காக சென்ற தன்ஷிகாவிடம், சாமியார் ஒருவர் மரப்பெட்டி ஒன்றைக் கையில் கொடுத்து, அதனை தமிழகத்தின் தென்கோடியில் உள்ள அய்யங்கார்புரம் என்ற கிராமத்திற்கு எடுத்துச் செல்ல சொல்கிறார்.
அந்த மரப்பெட்டியை உன் வம்சத்தைச் சேர்ந்தவர்கள் தான் கொடுக்க வேண்டும் என்பது விதி என்று கூறி அதை தன்ஷிகாவின் கையில் கொடுத்ததும் அவர் இறந்து விடுகிறார்.
வேறு வழியின்றி வேண்டா வெறுப்பாக அம்மரப்பட்டியை தூக்கிக் கொண்டு தமிழகத்திற்கு வருகிறார்., அங்கிருந்து பாண்டிச்சேரி செல்ல திட்டமிடுகிறார். ஆனால், அதற்கு பின்னால் நடக்கும் திடீர் சம்பவங்கள் தன்ஷிகாவை அய்யங்கார்புரத்திற்கு வர வைத்து விடுகிறது.
அங்கிருக்கும் பழமை வாய்ந்த கோவிலுக்குச் சென்று, அங்குள்ள பூசாரியிடம் அம்மரப்பட்டியை கொடுக்கிறார் தன்ஷிகா. அம்மரப்பட்டியைப் பற்றி ஏற்கனவே அறிந்திருந்த அந்த பூசாரி, அதனை வாங்க மறுத்துவிடுகிறார்.
அம்மரப்பெட்டியை அந்த கோவிலில் விட்டுவிட்டு அந்த ஊரை விட்டு வெளியேற நினைக்கிறார் தன்ஷிகா. ஆனால், அக்கிராமத்தை விட்டு அவரால் வெளியேற முடியவில்லை.
அதுமட்டுமல்லாமல், அம்மரப்பெட்டியை அடைய பலரும் முயற்சிக்கின்றனர். அம்மரப்பெட்டியின் மர்மம் தான் என்ன.?? ஐந்தாம் வேதம் என்ன.?? ஐந்தாம் வேதத்தை கண்டிபிடிக்க தடையாக இருப்பவர்கள் யார் யார்.??? என்ற கேள்விகளுக்கான விடை தான் மீதித் தொடருக்கான கதை.
சாய் தன்ஷிகா கொடுத்த கேரக்டரை சிறப்பாக செய்திருக்கிறார். YG மகேந்திரனின் நடிப்பும் அருமை. சந்தோஷ் பிரதாப், விவேக் ராஜகோபால், கிரிஷ் குருப், ராம்ஜி, தேவதர்ஷினி, மேத்யூ வர்கீஸ், பொன்வண்ணன் என இத்தோடரில் நடித்திருக்கும் அணைவருமே அவரவர் கதாபாத்திரம் உணர்ந்து சிறப்பாக நடித்துள்ளார்கள்.ஸ்ரீனிவாசன் தேவராஜனின் ஒளிப்பதிவு தொடருக்கு பெரிய பலம். ரேவாவின் இசை தொடரை ரசிக்கவைக்கிறது
பல வருடங்களுக்கு முன் பலரையும் உறைய வைத்த மர்மதேசம் என்ற தொடரினை இயக்கிய நாகாவின் இயக்கத்தில் தான் இந்த தொடர் உருவாகியிருக்கிறது.
புராணக் கதையை கையில் எடுத்து அதை நேர்த்தியாக நகர்த்திச் சென்றிருக்கிறார் இயக்குனர் நாகா. நான்கு வேதங்களை நாம் அனைவரும் அறிவோம். அதென்ன ஐந்தாம் வேதம்.? அந்த வேதம் எதை பறைசாற்றுகிறது.? என்ற கேள்விக்கான விடையை மிக தெளிவாக இத்தொடரின் மூலம் எல்லோரும் ரசிக்கும்படி சொல்லியிருக்கியிருக்கிறார் இயக்குனர் நாகா. பாராட்டுக்கள்.